Un novo curso

Ola a todos e todas! Iniciamos este novo curso con algúns problemiñas, pero como nunca choveu que non escampara, xa estamos aquí de novo e con tantas ganas como sempre.
Para comezar, queremos recomendarvos uns libros, que agardamos que leades e logo nos comentedes. Imos alá!!!

Este título, Un baño de gargalladas, publicouse no verán e conta a historia dunha nécora á que non lle gusta nada lavarse; seus pais atoparán a maneira de facerlle ver a importancia da auga e o xabrón. Para os máis cativos do cole.

E seguimos no mar, agora con sereas. Rivadulla Corcón, o actor e poeta muxián, publica Amar a unha serea. Conta a historia de Varucho, un neno de 8 anos que se namora de Almudena e para que sexa a súa moza lle regala unha cola de serea e... Conseguirá namorala? Hai que lelo!!




Marcos Calveiro gañou outro premio máis con esta colorista novela na que conta a amizade que establece un adolescente co pintor Van Gogh na cidade francesa de Auvers. Para os do segundo ciclo ESO.

E tamén para eles é Menú de enganos, un libro de relatos que Núñez Singala presenta como un menú moi apetecible. Hai algúns para rir, outros para reflexionar...

E onde se viu un menú sen nada de chocolate? Non podía ser, así que a última recomendación: Corazón de chocolate, no que se conta como Uxío, alias Tintimán, descobre que baixo as prazas da catedral compostelá hai secretos labirintos que agochan moitos misterios. E a que vén o do título? Ai, descubrídeo vós.

Agardamos os vosos comentarios. Ánimo e bo curso a todos!!