EDL

EDL

16/11/17

SON MULLER. Contra a violencia de xénero

Rematado o Samaín e comidas as castañas do magosto, que celebramos onte, xa vén aí unha data importante: o 25 de Novembro.
Para irnos preparando, queremos deixarvos este vídeoclip do grupo MBCP que gañou o 1º premio de música infantil e xuvenil do Certame "Quero cantar" da Deputación da Coruña.
A ver se vos gusta!

31/10/17

Día de Samaín 2017

Grandes e pequenos pasámolo de medo!! Grazas ás familias por colaborar na elaboración destas magníficas cabazas  e a  toda a comunidade educativa pola súa implicación.









25/10/17

E unha lectura de medo!

Ao fío destas datas, recomendámosvos, para os pequenos e non tan pequenos, esta novidade de Xerais:


Está chegando o Samaín...

E o centro comeza a dar medo!!😶😶😶😶



Para informarvos e prepararvos ben, podedes atopar moitos recursos clicando na imaxe:

https://sites.google.com/site/recursosparaosamain/

09/10/17

Grafitti normalizador

O Concello de Lousame organizou esta semana catro obradoiros de cultura urbana dirixidos á mocidade do municipio, dentro do proxecto “Mocidade creativa en Lousame”, unha iniciativa subvencionada pola Consellería de Política Social da Xunta de Galicia. Consistiu en dous obradoiros de graffiti, un de rap en galego e outro de beatbox cos que se pretendía " fomentar actitudes creativas e innovadoras da mocidade de Lousame e sempre a través da dinamización da lingua galega”, segundo explicou  a concelleira de Mocidade. 
O resultado máis visible e perdurable desta actividade é un grafitti que adornará de agora en diante unha das entradas do noso centro e que recupera un vello lema do noso EDL: "Fala galego, non te perdas". Tamén nos serve para darlle as grazas ao EDL do curso pasado, pois este era un proxecto seu que non puido levarse a cabo por falta de orzamento. Seguro que estarán content@s de ver cumprido o seu desexo!





06/10/17

GARCÍA TEIJEIRO, PREMIO NACIONAL DE LITERATURA INFANTIL/XUVENIL

O outono chega cargado de premios para a nosa literatura. O Ministerio de Cultura, acaba de concederlle o Premio Nacional de Literatura Infantil e Xuvenil ao escritor Antonio García Teijeiro,  polo seu libro Poemar o mar.. Teijeiro é un firme defensor da  poesía, que considera "un xénero tan maldito como necesario" 
Poemar o mar é, en palabras o autor,  "unha suma total das súas vivencias e lecturas en relación á auga mariña" na que se mesturan a emoción co ritmo e a musicalidade.

Os alumnos e alumnas de 4º de ESO rendémoslle a nosa particular homenaxe por este premio do xeito que a el máis lle gusta, facendo poesía na aula. Logo colgamos o resultado no Taboleiro da lingua. Velaquí o resultado.



01/10/17

COMEZAMOS O CURSO 17/18!

Aínda que xa hai quince días que empezamos, ata agora non conseguimos aterrar de todo. Pero xa estamos aquí, con ánimos renovados, para falar da nosa lingua e todo o que xira arredor dela: literatura, música, xente, agasallos, festas, gastronomía...
Este vai ser o curso de María Victoria Moreno, á que lle dedicamos a Festa das Letras, pero tamén nos agardan unha morea de novidades musicais, literarias e doutro tipo.
En nada xa estaremos enguedellados co  Samaín, os magostos  ou o nadal, pero pouco a pouco; de momento, outubro é mes de novidades literarias, como as que aquí vos deixamos. Algunhas estarán en breve na nosa biblioteca; preguntade por elas.




13/06/17

COMO SE CHAMA?

Seguimos coa actividade comezada o curso pasado, na que pretendiamos dar cabida a distintos campos semánticos. Queremos ampliar o vocabulario galego que, na maior parte das ocasións, substituímos por castelanismos. O ano anterior traballamos co léxico da roupa e este correspóndelle ao léxico do material escolar. Desta volta,  o alumnado de 6º de Primaria foi quen realizou o traballou e colaborou para a toma das fotografías. Vede o vídeo e opinade. Para o próximo curso, outro campo semántico. Cal propodes vós?



II MERCADO TRADICIONAL



O EDL non ten máis que palabras de agradecemento para todos e todas os que permitistes que o II Mercado Tradicional do noso centro puidese levarse a cabo e ademais de maneira exitosa. Sen a vosa colaboración, nada podería chegar a termo, mais a satisfacción máis grande que temos como equipo é poder comprobar que todo o alumnado, sen excepcións, se integrou, gozou, traballou, participou e, sobre todo, coñeceu e entrou en contacto cunha parte da nosa cultura tradicional que non debemos esquecer.
Mil agradecementos tamén para os oficiantes, veciños de Lousame e da contorna, sen eles nada sería posible: o batán, ferreiro, hortelá, canteiro, carpinteiro, palilleira, mineiro, costureira, tecelá, muiñeiro, cesteiro, San Cosmeira, serrador, apicultor, mariñeiro (representación do Museo do Mar de Noia) e artesán de gaitas.
Grazas tamén a Fernando Docampo que, xunto cos compoñentes da agrupación Gaitas do Liceo de Noia e O son do Pote de Lousame, nos permitiu gozar de música tradicional durante toda a mañá. Á asociación A Creba tamén lles debemos o noso agradecemento así como á mostra das galiñas de Mos e produtos ecolóxicos da terra.
E por último ao Concello que puxo todo o que estaba na súa man para facilitarnos o traballo.

Non vos perdades as FOTOS, nelas veredes todos os obradoiros e os postos de comida, os bailes, tanto do profesorado como do alumnado, e os estupendos maios realizados.

Para vervos no programa A Revista da TVG, clicade AQUÍ E AQUÍ.









09/06/17

PREPARATIVOS

Mañá é o gran día, despois do traballo de todos e todas, por fin imos poder gozar do II Mercado Tradicional no noso centro. De momento aquí vos deixamos unhas cantas fotografías dos preparativos do evento. 
Dende o EDL esperamos, sinceramente, que todo sexa do voso agrado e que todos e todas o poidamos pasar moi, moi ben.
Unha vez máis, recordámoslles ás familias que están convidadas, esperámolas!!!