FELIZ VERÁN A TOD@S!!

E case sen decatarnos, o curso chegou á súa fin. Despedímonos até breve coa imaxe do noso taboleiro, preparado tamén para o descanso.  Non fai falla dicir máis. Boas vacacións a todos!!

INTERCAMBIO LINGÜÍSTICO_CULTURAL II

E por fin o 28 de maio os alumnos e alumnas do IES As Bizocas (O Grove), acompañados dos seus profesores, devolvéronnos a visita e viñeron a Lousame. 

Logo de recibilos cun pequeno ágape e de escoitaren a benvida da nosa directora, dirixímonos ata as Minas de San Finx. Alí, Maite Sobradelo exerceu de guía explicándonos a historia das minas ata hoxe e amosándonos o Museo e a súa contorna.

A continuación, realizamos unha visita guiada polo Concello de Noia e o seu casco antigo e, para rematar, fomos visitar Castro Baroña, onde puidemos comer, facer algúns xogos e descansar antes de iniciar a viaxe de regreso ao colexio.

E alí chegou a hora das despedidas e da promesa de non perder o contacto. Foi unha experiencia fantástica que en cursos vindeiros  habería que repetir. Deixámosvos algunhas fotos para a lembranza.

INTERCAMBIO O GROVE II_MINAS,NOIA on PhotoPeach

INTERCAMBIO O GROVE II_BAROÑA, DESPEDIDA on PhotoPeach

Anagnórise no teatro

O 22 de maio, os alumnos e alumnas de 4º ESO fomos ata Porto do Son para ver a versión teatral de Anagnórise, representada por Limiar teatro. Estas son algunhas imaxes para o recordo.

ANÁGNORISE. A BANDA DA LOBA

Compartimos o vídeoclip co que o grupo A banda da loba homenaxeou a María Victoria Moreno e a súa obra Anagnórise. Esperamos que vos guste.

Feliz Día das letras 2018!!

Non deixedes de visitar a exposición que con motivo desta efeméride se dispuxo no corredor central do centro; ademais de lembrar aos homenaxeados ata agora, e saber máis sobre a figura de María Victoria Moreno, poderedes ver unha exposición de poemas do alumnado, realizar distintos xogos e pasatempos e mesmo facer unha foto coa súa imaxe.

E lembrade que "Día das letras" han de ser todos os do ano!!

III Mercado Tradicional

E por fin o día 11 celebramos a terceira edición do noso Mercado Tradicional, organizado polo EDL en colaboración con toda a comunidade educativa, e o patio norte do centro converteuse, durante toda a mañá, nunha feira dos oficios, na que se podían atopar zoqueiros, cesteiros, canteiros, carpinteiros, fiandeiras, costureiras, palilleiras...; acompañáronnos tamén o Museo do Mar de Noia, o MUPEGA, a Asociación do Traxe Tradicional e as Minas de San Finx; de darnos de comer ocupáronse filloeiras, rosquilleiras, panadeiros, un churreiro e os nenos e nenas, con postos de bolos preñados, rosca e outras delicias. Como non podía faltar a música, esta correu a cargo do alumnado que durante o curso asistiu a clases de baile e música tradicional e do grupo O Son do Pote; os asistentes divertíronse en xogos tradicionais, na Mesa das Letras galegas ou facendo papiroflexia e globoflexia... Ata nos amosaron como se facía unha malla!

En fin, un ano máis tivemos unha xornada de convivencia de toda a comunidade educativa cos veciños e veciñas do Concello  e da contorna, que serviu para pór en valor de novo o noso patrimonio material e inmaterial, do que forma parte, como non, o seu valor máis prezado e o que lle dá sustento: a lingua.

Estas son algunhas das imaxes do día; poderedes ver máis en breve na galería da nosa web.

MERCADO TRADICIONAL

Achégase xa a  terceira edición do noso Mercado  tradicional, que se celebrará o venres 11, e xa se nota no ambiente do centro:  cheira a xesta, fiuncho, calas, pampullos...; nos corredores amoréanse os froitos; óense coplas.... En fin, estase preparando unha boa! E todo baixo a mirada atenta da grande protagonista do maio deste ano, María Victoria Moreno, que desde os taboleiros do corredor central parece gozar deste proxecto lingüístico-cultural do CPI Cernadas de Castro.

MATERIAIS LETRAS GALEGAS 2018

Vaise achegando o Día do libro e o mes das nosas letras que, como podedes ver nos taboleiros do centro e no programa de actividades extraescolares, celebraremos con moitas actuacións.

Como cada ano, o Seminario Galán achéganos moitas propostas e materiais para celebrar o Día das letras que queremos compartir con tod@s vós. Para acceder a eles, clicade na imaxe.

INTERCAMBIO LINGÜÍSTICO-CULTURAL-I

Era este un proxecto do EDL dende hai tempo que por fin este curso se puido realizar co IES As Bizocas d’O Grove, ao que damos as grazas xa pola fantástica xornada que nos prepararon.

Logo do intercambio de cartas e materiais entre  o alumnado, que serviu para crear unha enorme expectación, na mañá de onte, 17 de abril, chegamos ao Grove e fomos recibidos no centro cunha grande pancarta..

Tralas palabras de benvida da directora e as  presentacións en persoa do alumnado, coas que pasamos un bo anaco, iniciamos un percorrido por distintos puntos da vila  guiados por un cicerone excepcional, o profesor Pepe García. Para comezar,demos un pequeno paseo pola Toxa e visitamos a aldea dos Grobits e os literarios burros da illa (Emilia, Pardo, Bazán e…); a continuación, fomos en bus ata Porto Meloxo e fixemos unha pequena camiñada ata as salgadeiras As Moreiras, onde un guía nos ilustrou sobre distintos aspectos desta antiga técnica de conservación do peixe. Como aínda quedaban folgos, subimos á Siradella, e gozamos das fermosas vistas que ofrecen os miradoiros. Xa para rematar, comemos no centro da vila e levamos aos compañeiros do Grove ata o seu centro, onde os despedimos para volver a Lousame; antes, claro, aínda paramos na fermosa Praia da Lanzada.

Foi unha experiencia moi enriquecedora para todos, profes e alumnos, tanto no seu aspecto social como cultural e, por suposto, lingüístico, porque toda a actividade se realizou na nosa lingua.

O 30 de maio devolverannos a visita. Xa nos tarda!!

Intercambio Grove_presentacións on PhotoPeach

Intercambio O Grove_Salgadeiras As Moreiras on PhotoPeach

Intercambio O Grove_Toxa,Porto Meloxo e A Siradella on PhotoPeach

Un pouco de humor...

Para enfrontar a realidade, porque aínda hai máis dos que quixeramos!