NÓMADES

Unha recomendación literaria:

O ilustrador Xosé Tomás presentou a semana pasada en Santiago, na Biblioteca Ánxel Casal, a súa novela gráfica Nómades (Galaxia), artellada sobre breves pero reveladores episodios que teñen como fío condutor a emigración e como protagonistas a mulleres de diferentes idades e condicións. Polas súas páxinas pasan mulleres que atravesan o océano en caiuco, que se prostitúen para enviar o diñeiro ás súas familias, que emigran na vellez por acompañar os fillos e non se adaptan, que viven ás agachadas o seu lesbianismo ou que non poden regresar ao seu país a enterrar a un ser querido pola situación laboral irregular na que se atopan. 

Nun país de emigrantes coma o novo, hanos vir ben a todos: profesorado de ciencias sociais, titores, orientación, clubes lectura ... e por suposto pais e alumnado, cremos que de secundaria.

En canto se poida, traerémolo para a biblioteca, que por certo reabre mañá, o Día das bibliotecas escolares. Animádevos a lelo e logo contádenos!