O mércores, 5 de decembro, recibimos a visita de Francisco Castro, autor do
libro Chamádeme Simbad que, nesta
ocasión, lemos os alumnos de 1º ESO.
Falounos un anaco sobre a obra e explicounos que decidiu escribila cando
comezou a ver os síntomas da enfermidade do alzhéimer na súa propia nai, mais a
verdadeira razón pola que se decidiu a facer o libro foi outra: tentaba falar
dun tema importante na nosa sociedade. Un tema, coma outros moitos, que ás
veces a xente deixa de lado para fixarse
en acontecementos ou personaxes da sociedade irrelevantes.
Na charla-coloquio que tivemos a continuación, amosouse como un home
comprometido coa cultura en xeral e coa cultura galega en particular. Como
presidente de GALIX, explicounos como funciona a asociación e cal é o seu
traballo. Falounos tamén dalgunhas das súas obras xa publicadas, das súas
lecturas preferidas, dos seus hábitos de traballo e como non da sua bitácora A canción do náufrago.
Rematamos a sesión con este home de hábitos tan saudables como o de erguerse
todos os días ás cinco da mañá para poder convivir, durante dúas horas, cos
personaxes das súas obras. Dúas horas intensas onde só existen el e os
protagonistas dos seus libros.
Sem comentários:
Enviar um comentário